රාජකාරිය

කිරිසිනා මල් සලා දඟ දමන්නට ඇතී

ඇස් පියන් යට ඉඳන් ආදරේ බොන්නැතී

පියෙන් පිය පියනගා ශිල්ප උගනින්නැතී

දසකෙකුත් තුන්වසක් අකුරු අමුණන්නැතී

කැඩුණු ලී බංකුවේ ඉඳන් ඇඹරෙන්නැතී

රෑ දවල් වෙනස් බව නොම දැනෙන්නට ඇතී

පිටු පිරුණු මුතු අකුරු නුඹට හිනැහෙන්නැතී

හති වැටෙන තරඟයෙන් ජය ලබන්නට ඇතී

සරසවියේ උස් වියන් අඬ ගසන්නට ඇතී

චේ මාක්ස් එංගල්ස් එක්ක ඇවිදින්නැතී

රොබරෝසියා සුවඳේ වෙලී පැටලෙන්නැතී

ලෝගුවේ බර හිතට මහමෙරක් වෙන්නැතී

මව් බිමට සලකන්න හීන අහුලන්නැතී

දහසකුත් එකක් දේ අතැඹුලට ගන්නැතී

සියයකින් එකෙක් වී මේ බිමට එන්නැතී

හෙට දිනේ දිසාවක කිරුළු පළඳිනු ඇතී

ගඟුලකට ඇහැකි නම් ජල තරඟ නංවන්න

කඳු ශිඛර හෙල් මැදින් සීරුවට ඇවිදින්න

රළු පරළු ගල් බොරළු කැට සුමට කරලන්න

පිය නඟන මාවතේ දනන් සිත් සනසන්න

ඉරි තැලුණු මහ පොලොව ස්නේහයෙන් නහවන්න

හෙට දකින කැකුළු මල් ආදරෙන් පුබුදන්න

සබඳ ඔබ ගඟුලක්ව රටට ජීවය දෙන්න

හැකිය සිඳු දකින දින සාමයෙන් සැතපෙන්න

ප්‍රභාත් චන්දිම