நாடக மேடை

உண்மையாய் சேவை செய்தவன்
எட்டி நின்று வேடிக்கை பார்க்கிறான்
அந்த நாடக மேடையை…….

சேவை எனும் போர்வை போர்த்தி
தன் வயிறு வளர்த்தவர்
மாலை மரியாதையோடு
மேடையிலே………

கடந்து வந்த காலங்கள்
அது தந்த பாடங்கள்
தான் வந்த பாதை
தான் பெற்ற புகழ்
தன்னைப் பற்றியே
பேசிக் கொண்டிருக்கிறார்
உண்மையில் சேவை செய்தவன்
எட்டி நின்று வேடிக்கை பார்க்கிறான்………

முகமூடி மனிதன்
தன் புகழ் பாடுவது கேட்டு
கை தட்டும் சமூகம்,
உண்மை மனிதன் பற்றி
அடுத்தவர் சொல்வதற்கே
இடங்கொடுப்பதில்லை……..

சேவை பற்றி பிரசங்கம் செய்தவர்
கையெழுத்தைப் பெற
முண்டியடிக்கிறது மக்கள் கூட்டம்
சேவை செய்தவனோ
மக்கள் தலையெழுத்தை நொந்தபடி
வேடிக்கை பார்க்கிறான்……….

சுயநலமாய் வாழ்ந்து
பொதுநலமாய் நடித்தவர்
சமூக சேவையாளர் விருதை
வென்று விட்டார்…….
பொதுநலமாய் வாழ்ந்தவன்
பொதுமக்களோடு நின்று
வேடிக்கை பார்க்கிறான்
அந்த நாடக மேடையை……….

Umananthini